1993-cü ildən Azərbaycanda hakimiyyəti ələ keçirmiş Əliyevlər rejimi 30 ildən artıqdır ki, ölkədə anti milli siyasət yeritməklə yanaşı, vətəndaşların hüquq və azadlıqlarını təmin etmir. O dövrdən başlayaraq, daha öncəki müəyyən bir dövr ərzində cəmiyyətdə formalaşmış demokratik dəyərlərin üzərinə total hücumlar həyata keçirilməkdədir.

Hakimiyyəti əldə saxlamaq naminə, YAP rejimi elə ilk gündən xalqa və cəmiyyətə qarşı siyasi təqib siyasəti həyata keçirməyə başlamış, vətəndaşların bütün siyasi hüquq və azadlıqları kobud surətdə pozulmuş və məhdudlaşdırılmışdır. Bu proses, 2003-cü ildə ində hakimiyyət İlham Əliyev tərəfindən ələ keçirdikdən sonra daha sərt formada həyata keçirilməkdədir. Korrupsiya, rüşvətxorluq və total hakimiyyət özbaşınalığının baş alıb getdiyi bir şəraitdə hakimiyyət və idarəçiliyi ən yüngül şəkildə belə təndiq edən şəxslər hakimiyyət tərəfindən dərhal təqiblərə məruz qalırlar. Bunun nəticəsi olaraq, keçən əsrin 90-cı illərin ikinci yarısından başlayaraq Azərbaycanda aparılan amansız siyasi təqiblər nəticəsində, Azərbaycan Avropa dövlətləri və keçmiş post sovet respublikaları arasında siyasi məhbusların sayına görə daimi birinci yerləri tutmaqdadır.

Son 20 il ərzində siyasi təqiblərə məruz qalan, və siyasi məhbus həyatı yaşayan şəxslərin sayı, istənilən zaman kəsiyində 100-150 nəfərdən aşağı olmamışdır. Hal-hazırda ölkədə siyasi təqiblər özünün ən yüksək zirvəsinə qalxmışdır. Ölkədaxili və Beynəlxalq Hüquq müdafiə təşkilatlarının da təsdiq etdikləri kimi, hazırda ölkədə siyasi məhbusların sayı 300 nəfəri ötmüşdür.

Ölkədə siyasi fəaliyyətə demək olar ki, tam olaraq qadağa qoyulmuşdur. Hətta hakim rejimin repsessiv təqibləri üzündən ölkəni tərk etməyə məcbur olmuş siyasi muhacirlər, müxtəlif vasitələrlə ələ keçirilərək ölkəyə gətirilir, saxta və qondarma ittihamlarla təqib olunurlar. Artıq ölkədə siyasi repsesiya və təqiblərin miqyası ən yüksək həddə çatıb və bütün hədləri ötmüşdür.

Bütün bunları nəzərə alaraq, Azərbaycan Xalq Parlamenti hakimiyyətdən siyasi təqiblərə dərhal son qoyulmasını, siyasi fəaliyyətə, qanunlarda nəzərdə tutulmuş qaydada imkan yaradılmasını və bütün siyasi məhbusların hamılıqla azadlığa buraxılmasını tələb edir.

Azərbaycan Xalq Parlamentinin dönəm sədri: Abid Qafarov.

___ yanvar 2025-ci il.